طالبانو په هرات کې د داعش د ۱۳جنګیالیو د وژلو ادعا وکړه
۸صبح، هرات: په هرات ښار کې له څو ساعته نښتې وروسته طالبانو ادعا کړې، چې په دغه ولایت کې یې د داعش د خراسان څانګې ۱۳ جنګیالی وژلی دی.
په هرات کې د طالبانو ډلې سرچینو د پنجشنبې په ورځ (وري ۱۷)، ۸صبح ورځپاڼې ته وویل، چې په هرات ښار کې د تېرې شپې نښتې د داعش پر پټنځایونو د دغې ډلې د عملیاتو له امله شوې دي.
که څه هم سرچينې د جګړې د کره سيمې په اړه څه نه وايي، خو د جګړې له پېلېدو وروسته، په هرات کې د طالبانو د اطلاعاتو او فرهنګ رييس پر خپله ټويټرپاڼه د هرات ښار په یوولسمه او نهمه ناحیه کې د داعش پر دوو پټنځايونو د عملياتو خبر ورکړ.
ویل کیږي چې نښتو پنځه ساعته دوام وکړ او تر اوسه په کره توګه څرګنده نه ده چې دا نښتې خپلمنځي وې او که د داعش له خراسان څانګې سره.
ځینو سرچینو ویلي دي، چې په هرات کې د تېرې شپې نښتې د طالبانو د ډلو ترمنځ د اختلافاتو له امله شوې دي.
په همدې حال کې په هرات کې د جګړو د شاوخوا سیمو اوسېدونکي وايي، چې د طالبانو په بریدونو کې یو شمېر کورونه چې په سیمو کې وو، وران شوي دي. د دوی په وینا، طالبانو درنې وسلې کارولي او په ځینو موردونو کې یې له چاودېدونکو توکو ډکو بوشکو نه هم کار اخيستی دی.
په هغو تصویرونو کې چې د ۸صبح ورځپاڼې لاسته ورغلي، لیدل کېږي چې طالبان د تېرې شپې د نښتو په یوه سیمه کې ځيني کورونه چې د دوی په وينا، د داعشيانو پټنځایونه دي، په سکواټر ړنګوي.
تراوسه څرګنده نه ده چې په دغو نښتو کې څومره وسله والو طالبانو ته مرګ ژوبله اوښتې ده.
د طالبانو د راپورونو له مخې، د افغانستان په لویدیځ کې هرات او په شمال کې بلخ هغه ولایتونو دي چې په دې وروستیو کې داعش ډلې پکې تر ټولو زیات خوځښتونه لرلې دي.
