۸صبح، کابل: د ملګرو ملتونو د بشري استوګنې ادارې (UN-Habitat) اعلان کړی چې په کندوز او بغلان ولایتونو کې له ۸۰۰ زیانمنو راستنېدونکو سره د هغوی د کورونو د بیارغونې او ښهوالي په برخه کې مرسته کوي.
دې ادارې سهشنبه د وږي پر ۳۱مه، پر خپله اېکس پاڼه کې لیکلي چې دغه پروګرام د افغانستان د ځانګړي اماني صندوق(STFA) په ملاتړ پلې کېږي.
د ملګرو ملتونو د بشري استوګنې ادارې زیاته کړې چې راستنې شوې کورنۍ مناسبې سرپناه ته بېړنۍ اړتیا لري او دغه پروګرام د اړمنو کسانو د کورونو د بیارغونې لپاره د مرستې په موخه پلې کېږي.
ملګرو ملتونو ویلي، سره له دې چې دغه پروګرام پیل شوی، خو راستنېدونکو ته د سرپناه اړتیا لا هم پراخه ده او ګڼې کورنۍ د خپلو کورونو د بیارغونې لپاره مرستې ته اړتیا لري.
دا په داسې حال کې ده چې له ګاونډیو هېوادونو د افغانانو د راستنېدو پراخ بهیر پر کوربه سیمو ډېر فشار راوستی دی.
طالبانو هم تر دې وړاندې ویلي وو چې د روان کال په لومړیو شپږو میاشتو کې له ایران او پاکستان تر ۶۱۷ زرو ډېر کسان هېواد ته ستانه شوي دي.
