په هېواد کې د وریجو د حاصلاتو زیاتېدل

د کرنې او اوبو لګولو وزارت او د احصایې او مالوماتو د ملي ادارې د یوه رپوټ له مخې، په هېواد کې د شولو کښت او د وریجو حاصلات په ۱۳۹۹ کال کې د ۱۳۹۸ کال په پرتله ۱۵ سلنه زیات شوي دي.
دغه رپوټ د کرنې وزارت او د احصایې او مالوماتو د ملي ادارې له خوا په ۱۳۹۹ کال کې د وریجو د تولید په نوم برابر شوی دی. د کرنې وزارت ویلي چې دغه رپوټ د ځانګړو شمېرو پر بنسټ برابر شوی دی.
ددغه رپوټ پر بنسټ تېر کال د وریجو حاصلات ۳۸۳ زره ټنه وو، خو د نوې
سروې رپوټ ښيي چې په روان کال کې دا کچه د ۵۷ زره ټنو په زیاتوالي ۴۴۰ زره ټنو ته رسېدلې ده.
په رپوټ کې راغلي چې تېر کال د هېواد د شولو کروندې ۱۲۸ زره هکتاره وې، په داسې حال کې چې د نوې سروې له مخې، سږ کال د شولو کروندې د پنځه اعشاریه ۱۹ زره هکتاره په زیاتوالي سره پنځه اعشاریه ۱۴۷ زره هکتاره ته رسېدلې دي.
د کرنې وزارت وایي چې دا سروې د هېواد په نولسو ولایتونو کې په څو بڼو ترسره شوې ده. دغه ارزونه د شولو له کرلو بیا د حاصلاتو تر راټولولو پورې په پنځو میاشتو کې بشپړه شوې ده.
د کرنې وزارت وايي چې په ۱۳۹۹ کال د ۱۳۹۸ کال په پرتله په داسې حال کې د وریجو حاصلات ۱۵ سلنه زیات شوي چې وریجې د هېوادوالو ورځني خواړه بلل کېږي او په پراخه کچه ترې استفاده کېږي.
د کرنې وزارت او د احصایې او مالوماتو د ملي ادارې د ګډې سروې له مخې، کندز د ۸ اعشاریه ۴۶ زره هکتاره شولو د کروندې او ۱۴۰ زره متریک ټنه وریجو په تولید سره د وریجو د تولیدونکو ولایتونو په سر کې دی.
په همدې توګه، تخار د ۷۵ زره ټنه وریجو په تولید سره دوهم، بغلان د ۶۳ زره ټنه وریجو په تولید سره درېیم او ننګرهار د ۴۷ زره ټنه وریجو په تولید سره څلورم ځای لري.
همداراز هرات د ۲۸ زره ټنو په تولید، کنړ د شل زره ټنو په تولید، بلخ د ۱۸ زره ټنو په تولید او لغمان د ۱۵ تنو په تولید سره په وروسته کچه کې دي. خوست، ارزګان، پکتیا، بدخشان، دایکندي، کابل، بادغیس، هلمند، بامیان، سرپل او غور هغه نور ولایتونه دي چې شولې پکې کرل کېږي.
د احصایې او مالوماتو د ملي ادارې د اټکل له مخې، افغانستان په ۱۳۹۹ کال کې ۶۵۵ زره ټنه وریجو ته اړتیا لري چې د تولید کچې ته په پام سره افغانستان د ۲۱۵ زره ټنه وریجو له کمښت سره مخامخ دی.