ولسي جرګې د دولتي کارکوونکو د معاشونو د یو شان کولو طرحه تصویب کړه

ولسي جرګې د مرغومي په اوولسمه نېټه د دولتي کارکوونکو د یو شان کولو طرحه تایید کړه. دا طرحه د ولسي جرګې د دېرشو غړو له خوا وړاندې شوې وه.
د ولسي جرګې رییس میررحمان رحماني وویل چې د جرګې د غړو د وړاندیز له مخې، د مامورینو، ښوونکو، متقاعدینو، اجیرانو او سرتېرو د معاشونو د یو شان کولو لپاره د ټولنیز عدالت د ټینګښت په موخه دې له ۹۱ او ۹۲ کوډونو، ان ټي اې، سوپر سکېل او سي بي آر څخه د دوی معاشونو ته د رتبو له مخې پیسې ورزیاتې شي. دا طرحه د رایو په اکثریت سره د ولسي جرګې له خوا تایید شوه او د مالي چارو او بودیجې کمېسیون ته دنده وسپارل شوه چې د مالي کال په بودیجه کې یې شامله کړي.
په دغه ناسته کې د ولسي جرګې رییس خبرداری ورکړ، ترهغه چې د ټولو ولایتونو لپاره په متوازنه توګه بودیجه نه وي بېله شوې دا مسوده به تایید نه کړي.
د ولسي جرګې رییس وویل: تر هغه چې د بودیجې مسوده تایید او وروستۍ نه شي، د ولسي جرګې غړي به د ژمي په رخصتیو ولاړ نه شي. د نوموړي په وینا، حکومت غواړي د بودیجې طرحه په وروستیو ورځو کې ورولېږي چې ولسي جرګه یې په بیړه په اړه پرېکړه وکړي.
د ۱۴۰۰ مالي کال لپاره ۴۵۲ میلیارد ډالره بودیجه اټکل شوې ده. په هغې ۲۹۵ میلیارده افغانۍ عادي او ۱۵۶ میلیارده افغانۍ هم پراختیايي بودیجه ده.