د کندهار لپاره نوی والي او د ملي امنیت رییس معرفي شول

د ولسمشر د ملي امنیت سلاکار حمدالله محب د مرغومي په څوارلسمه د کندهار د امنیتي وضعیت د ارزونې په موخه د يوه پلاوي په مشرۍ دغه ولايت ته سفر وکړ.
د ولسمشر د ملي امنیت سلاکار حمدالله محب چې د کندهار د امنیتي وضعیت د ارزونې په موخه یې دغه ولایت ته سفر کړی ؤ، وايي ولسمشر کندهار ته تر سفر وروسته د خلکو په غوښتنه او د قومونو په منځ کې د وروستیو ستونزو د حل په موخه دغه بدلونونه راوستي دي.
په کندهار کې وروستیو امنیتي ګواښونو د دولت لوړپوړي چارواکي اړ کړل، چې دې ولايت ته سفر وکړي.
نوموړي د کندهار لپاره د نويو چارواکو د معرفي کولو په غونډه کې وویل: ولسمشر د خلکو په غوښتنه د دغه ولایت لپاره نوی والي، د ملي امنیت رییس او د ۲۰۵ اتل قول اردو قوماندان ټاکلي دي.
محب په خپلو خبرو کې زیاته کړه چې د کندهار خلکو، دغه غوښتنې دې ولايت ته د ولسمشر د وروستي سفر پرمهال کړې وې.
د ملي امنیت شورا سلاکار همداراز وويل چې د کندهار په امنیتي برخه کې چې کومې ستونزې او اړتیاوې وې هغه مو ټولې یادداشت کړې او د حل په موخه به يې عملي ګامونه پورته شي.
د سيمه ييزو ارګانونو خپلواکې ادارې په وړانديز او د ولسمشر په منظورۍ، روح الله خان زاده خان زاده د کندهار لپاره د نوي والي په توګه، عطا محمد د دې ولايت د ملي امنيت د رييس په توګه او همدارنګه محمد شفيق رسول زی چې دوه اونۍ وړاندې د کندهار ۲۰۵ اتل قول اردو قوماندان په توګه ګمارل شوی ؤ، په دغه رسمي غونډه کې معرفي شول.
په ورته وخت کې د کندهار مخکینی والي حيات الله حيات وايي چې له پولیسو سره کمزورې همغږي په دې ولایت کې د حکومتولۍ پر چارو سیوری غوړولی ؤ.
له بلې خوا، د دې ولایت قومي مشران او د ولسي جرګې غړي له نویو ټاکل شویو چارواکو غواړي، چې د یوه پیاوړي مدیریت په رامنځته کولو سره دې د وروستیو امنیتي ګواښونو مخنیوی وکړي.
د کندهار لپاره د دغو نویو چارواکو ټاکنه داسې مهال کېږي، چې د دې ولایت په اوو ولسوالیو کې له تېرو درېيو میاشتو راهیسې پرلپسې جګړې روانې دي او طالبانو یو شمېر سيمې له حکومتي ځواکونو څخه نيولې دي.