د مشــرانـو جرګـې درې غـړي د بډو اخیستو په تور ونیول شول

لویې څارنوالۍ او د ملي امنیت عمومي ریاست اعلان کړی چې د مشرانو جرګې درې غړي د څلوېښت زره ډالرو بډو اخیستو په تور نیول شوي دي.
دغو دوو بنسټونو په یوه ګډه اعلامیه کې ویلي چې د مشرانو جرګې دغه درې غړي د مرغومي په اوومه نېټه په بلخ ولایت کې نیول شوي دي.
په دغه اعلامیه کې د نیول شویو سناتورانو نومونه نه دي اخیستل شوي. د اعلامیې له مخې، د ملي امنیت د عمومي ریاست ځواکونو او د لويې څارنوالۍ استازو د کشفي مالوماتو له مخې په ګډو عملیاتو کې د مشرانو جرګې دا درې غړي نیولي دي.
په اعلامیه کې راغلي چې د ملي امنیت ریاست ځواکونو د لویې څارنوالۍ د کنټرول او څارنې د عمومي ریاست له استازو سره په همغږۍ د مشرانو جرګې درې برحاله غړي چې بلخ ولایت ته د چارو د څارنې په موخه تللي وو، د اساسي قانون او نورو نافذه قوانینو پر بنسټ د بډو اخیستو په تور نیولي دي.
د ملي امنیت عمومي ریاست او لویې څارنوالۍ ویلي چې دا موضوع یې د اساسي قانون د ۱۰۲ مادې پربنسټ په لیکلې بڼه له مشرانو جرګې سره شریکه کړې ده.