۸صبح، کابل: په افغانستان کې د ملګرو ملتونو مرستندویه ادارې (یوناما) د کاج پر ښوونیز مرکز د ځانمرګي برید د لومړۍ کلیزې په مناسبت اعلان کړی چې ۵۴ کسان په کې وژل شوي او ۱۱۴ نور ټپیان شوي دي.
یوناما د شنبې شپه، د تلې میاشتې په ۸مه، پر اېکس په ټولنیزه پاڼه کې لیکلي چې د لسیزو جګړو او بې شمیره بریدونو نه جبران کیدونکي زیانونه اړولي او کورنۍ یې له ځواب، عدالت او حساب ورکولو پرته پریښي دي.
په همدې حال کې په افغانستان کې د ملګرو ملتونو مرستندویه دفتر ټینګار کړی چې دغه سازمان په افغانستان کې د دې او نورو له تاوتریخوالي ډکو پېښو له قربانیانو او خلکو سره په څنګ کې ولاړ دی.
یوناما زیاته کړې چې دا اداره د داسې افغانستان دفاع ته دوام ورکوي چې هر څوک پرته له وېرې خپل ورځنی ژوند پرمخ یوسي او د تاوتریخوالي عاملین حساب ورکوونکي اوسي.
د ویلو ده، چې تېر کال د تلې میاشتې په ۸مه د کابل په «دشت برچي» سیمه کې د کاج پر ښوونیز مرکز ځانمرګی برید شوی و.
هغه مهال په دغه برید کې د وژل شویو شمېر شاوخوا ۶۰ تنه او تر ۱۲۰ ډېر ټپیان شوي وو.
ډېری قربانيان او ټپيان هغه ښځينه زده کوونکي دي چې د «ازمایښتي کانکور» د ازموينې تېرولو په موخه سهار وختي دغه مرکز ته راتلې.
داعشډلې د دغه برید مسوولیت منلی دی.
د کاج پر ښوونیز مرکز برید او په دغه برید کې د لسګونو ښځینه زده کوونکو وژل کېدل په ټوله نړۍ کې له پراخو غبرګونونو او اعتراضونو سره مخ شول.