۸صبح، نیمروز: د نیمروز سیمهییزې سرچینې وايي چې په دغه ولایت کې د یوه تنکي ځوان زندۍ شوی مړی موندل شوی دی.
سرچينې ۸صبح ورځپاڼې ته ویلي چې د دې ۱۶ کلن تنکي ځوان مړی پنجشنبه د تلې پر ۱۶مه شاوخوا ۶:۳۰ بجې د نيمروز ولايت مرکز زرنج ښار د ورېښم پُل په سيمه کې موندل شوی دی.
دا ځوان دانیال نومېده او د زرنج د سیستان ښارګوټي اوسېدونکی و.
که څه هم تر اوسه د دې پېښې لامل او انګېزه نه ده څرګنده، خو ښايي دا ځوان وژل شوى وي.
په نیمروز کې طالبانو تراوسه په دې تړاو څه نه دي ویلي.
په دې وروستیو کې مرموزې وژنې ډېرې شوي.
دوه ورځې مخکې په هرات کې د یوې اووه کلنې نجلۍ مړی په داسې حال کې چې ستونی یې غوڅ شوی، لاسونه او پښې یې ترې پرې شوي، موندل شوی و.
