۸صبح، تخار: په تخار ولایت کې ځايي سرچینې وایي، چې ددغه ولایت په چاهآپ ولسوالۍ کې د نجونو د یوه ښوونځي ودانۍ د ځایي خلکو ، لخوا په ۶۰۰ زره افغانیو رغول شوی ده.
دغو سرچینو نن دوشنبه (د غبرګولي په ۱۵مه) وویل، وروسته له دې چې د دغه ولایت د پوهنې مسوولینو د (خلیان) په کلي کې د نجونو ښوونځي د بیارغونې په کار کې بې پروايي وکړه، سیمه والو، په ایران کې ددغه کلي د کډوالو په همکارۍ، ددغه ښوونځي ودانۍ ورغوله.
د سيمې د اوسېدونکو په وينا، د دغه ښوونځي پر بيارغونې شپږ سوه زره افغانۍ لګښت راغلی.
د تېر حکومت پر مهال دغه ښوونځي کې شاوخوا ۸۰۰ نجونو زدهکړې کولې.
که څه هم د پخوا په پرتله په ښوونځیو کې د زده کوونکو په شمېر کې د پام وړ کموالی راغلی دی، خو د طالبانو تر واکمنۍ مخکې، د چاهآب ولسوالۍ په ۵۰ ښوونځیو کې، شاوخوا ۱۶ زره زده کوونکي په زده کړو بوخت ول، چې نیمايي یې نجونې وې.
د يادونې وړ ده، چې د تېر حکومت پوځيانو او د وسله والو طالبانو ترمنځ د دوو لسيزو جګړو په ترڅ کې، په هېواد کې د ډېرو ښوونځيو ودانۍ زيانمنې شوې دي.
د نجونو دغه ښوونځی په داسې حال کې د خلیانو کلي د اوسېدونکو لخوا رغول شوی، چې طالبانو پر هېواد د خپلې واکمنۍ له پیل راهیسې، له شپږم ټولګي پورته نجونې، له زده کړو بېبرخې کړې دي.
