۸صبح، کابل: د طالبانو د ریاست الوزرا اداري مرستیال عبدالسلام حنفي د کډوالو په چارو کې د ملګرو ملتونو د عالي کمېشنرۍ (UNHCR) او د دغه سازمان د پراختیايي پروګرام (UNDP) له چارواکو سره لیدلي دي.
د طالبانو مرستیال ویاند حمدالله فطرت سهشنبه د چنګاښ پر ۱۶مه په خپرې کړې خبرپاڼې کې ویلي چې حنفي د ملګرو ملتونو د پراختیايي پروګرام له مشر الکساندر ډيکرو، د کډوالو په چارو کې د ملګرو ملتونو له عالي کمېشنر برهم صالح او مل پلاوي سره خبرې کړې دي.
د خبرپاڼې له مخې، الکساندر ډيکرو ویلي چې د ملګرو ملتونو پراختیايي پروګرام او نور همکار بنسټونه چمتو دي د اقتصادي سیستم او سیمهييز تجارت د پیاوړتیا، د زیربناوو جوړولو، د کرنې او اوبو لګولو د پراختیا په برخو کې اړینه همکاري وکړي.
برهم صالح هم د طالبانو او مرستندویه بنسټونو ترمنځ پر ګډې همغږۍ ټينګار کړی او ویلې یې دي چې له افغانانو سره به د کډوالو په چارو کې د ملګرو ملتونو د عالي کمېشنرۍ بشري مرستې دوام ولري.
نوموړي د افغانانو په ځانګړې توګه د راستنو شویو کډوالو بشري اړتیاوو ته په اشارې ویلي چې ملګري ملتونه به د هغوی د بیا ادغام په برخو کې خپلې هڅې دوامداره وساتي.
