۸صبح، بدخشان: سیمهییزې سرچینې وايي چې په بدخشان کې د «مایمي» ولسوالۍ ۲۰ بستریز روغتون چې له جوړېدو یې اته کاله تېرېږي، لا هم فعال شوی نه دی او د دغې ولسوالۍ اوسېدونکو ته روغتیايي خدمات نه وړاندې کوي.
سرچینو سهشنبه د وږي پر ۲۴مه ۸صبح ورځپاڼې ته وویل چې دا روغتون په «جامرچ علیا» کلي کې دی او روغتیايي خدماتو ته د سیمې د اوسېدونکو له اړتیا سربېره، له کارونې پرته پاتې دی.
د سرچینو په خبره، د سیمې اوسېدونکي اړ دي چې په لوړ لګښت اوږد واټن ووهي څو د درملنې لپاره فیضاباد ته ورسېږي.
سرچینې زیاتوي چې که دغه روغتون پرانېستل شي، د سیمې د اوسېدونکو ډېرې روغتیايي ستونزې ورسره هوارېدای شي.
هغوی وايي، په دغه مرکز کې د روغتیايي خدماتو وړاندې کول په ځانګړې توګه ښځو او ماشومانو ته، د مېندو او نویو زېږېدلو ماشومانو د مړینې په کمولو کې اغېزمن تمامېدای شي.
سرچینې ټينګار کوي چې د سیمې اوسېدونکي د دغه روغتون د فعالولو لپاره څو وارې مسوولانو ته ورغلي، خو تر اوسه ورته پام نه دی شوی.
