۸صبح، کابل: طالبانو ویلي چې پرون ۲۱۰ کډوالې کورنۍ چې ۱۰۱۰ کسان کېږي، له ګاونډیو هېوادونو په جبري توګه افغانستان ته راستنې شوې دي.
د طالبانو د ویاند مرستیال حمدالله فطرت چهارشنبه د وږي پر ۲۵مه، په یوه خبرپاڼه کې ویلي چې ۸۱ کورنۍ، چې ۴۶۸ کسان کېږي، د ننګرهار د تورخم له لارې هېواد ته راستنې شوې دي.
د دې خبرپاڼې له مخې، ۱۱ کورنۍ، چې ۵۹ کسان کېږي، د کندهار د سپین بولدک له لارې او ۹۹ کورنۍ چې ۴۴۰ کسان کېږي، د نیمروز د ورېښمو لارې له لارې افغانستان ته راغلې دي.
دغه راز ۱۰ کورنۍ چې ۴۳ کسان کېږي، د هرات د اسلام کلا له لارې هېواد ته راستنې شوې دي.
دا په داسې حال کې ده چې د طالبانو له واکمنېدو وروسته، ګڼې کورنۍ د بېکارۍ او بېوزلۍ له امله له افغانستانه وځي او کډوالۍ ته مخه کوي.
تر دې وړاندې د حالوش په نوم د بشري حقونو سازمان راپور ورکړی و چې ۱۷ افغانان د ایران په سراوان سیمه کې د تندې له امله مړه شوي دي.
