۸صبح، هلمند: سرچینې د هلمند ولایت پر ګرشک ولسوالۍ له هوایي برید څخه خبر ورکوي.
یوې سرچینې ۸صبح ورځپاڼې ته وویل، چې دغه برید پنجشنبه د وږي پر ۱۷ د هلمند ولایت په ګرشک ولسوالۍ کې د طالبانو پر لوا شوی دی.
د دغه برید په پایله کې د طالبانو د لوا د قوماندان په ګډون ۲۱ نور طالبان وژل شوي دي.
د سرچینې په وینا، پر تلفاتو سربېره په دغه پوځي مرکز کې یو شمېر تجهیزاتو هم اور اخیستی دی.
سرچینې که څه هم په دې پېښه کې د یو شمېر طالب جنګیالیو ټپي کېدل تاییدوي، خو د ټپیانو د کره شمېر په اړه څه نه وايي.
دا په داسې حال کې ده، چې په وروستیو ورځو کې د هېواد په زیاتو برخو کې هوایي بریدونه شوي دي.
د دغه برید مسوولیت تر اوسه چا پر غاړه نه دی اخیستی.
طالبانو په دې اړه څه نه دي ویلي.
د ویلو ده، چې طالبان امریکا د افغانستان له هوايي حریم څخه پر سرغړونې تورنوي؛ خو دغه بریدونه په خپلواکه توګه نه تاییدوي.
