۸صبح، هلمند: په هلمند کې روغتیايي سرچینې وايي چې په دغه ولایت کې یو ۵۰ کلن سړی پر کانګو ناروغۍ تر اخته کېدو وروسته مړ شوی دی.
سرچینو دوشنبه د چنګاښ پر ۲۵مه ویلي چې دا کس پرون د موسیکلا ولسوالۍ اړوند په «یتیمچي» کلي کې مړ شوی دی.
د هلمند موسیکلا ولسوالۍ د مرکزي روغتون امر ډاکتر احسانالله داوري ویلي چې سیمه ته روغتیايي ډله رسېدلې ده.
نوموړي زیاته کړې چې کلی دواپاشي شوی او خلکو ته هم په دې هکله پوهاوی ورکړل شوی دی.
د یادونې ده چې د روانې میاشتې پر ۷مه د کندوز انتاني او کویډ – ۱۹ حوزوي روغتون ویلي و چې په دغه ولایت کې د کانګو ناروغۍ پېښې ډېرې شوې دي.
د روغتیايي کارپوهانو په وینا، کانګو یا د وینې بهوونکې تبې ناورغي د څارویو د کنې په واسطه د انسان بدن ته ننوځي او نښې یې سردرد، سخته تبه، د ملا او بندونو درد، خوابدي، د سترګو سره کېدل، ستوني درند او ستړیا بلل کېږي.
ډاکټران سپارښتنه کوي چې پر دې ناروغۍ د اخته کېدو مخنیوي لپاره باید د څارویو سره د مخامخېدو پرمهال دستکشې، ماسک، موزې او سپینه چپنه واغوستل شي.
