۸صبح، کابل: بلومبرګ راپور ورکړی چې امریکا پاکستان ته د یو شمېر افغان پناه غوښتونکو د لېږدولو لپاره پلان جوړوي.
د دغه راپور له مخې چې دوشنبه د لړم پر ۴مه، خپور شوی، یو شمېر نیول شویو افغانانو ته ویل شوي چې ډېر ژر به پاکستان یا افغانستان ته ولېږدول شي.
تمه ده چې د دغو کسانو د لېږد الوتنه په راتلونکو اوونیو کې ترسره شي؛ خو دا پلان تر اوسه په رسمي توګه نه دی اعلان شوی.
په دغو کسانو کې د هغو افغانانو خپلوان هم شامل دي چې د طالبانو تر بیا واکمنېدو مخکې یې له امریکايي پوځ سره همکاري کړې وه.
امریکا ته د افغانانو د لېږد د مرستې بنسټ (افغانایوک) وايي چې د تلې له ۲۲مې راهیسې یې د افغانانو د احتمالي لېږد په اړه لږ تر لږه ۳۰ راپورونه ترلاسه کړي دي.
دغه راپورونه د امریکا په ۱۱ ایالتونو کې د ۱۵ توقیفځایونو په اړه دي.
افغانایوک د امریکا له حکومته غوښتي چې د دغو کسانو د لېږد ځای څرګند کړي.
دغه بنسټ زیاته کړې چې د دغو کسانو له لېږد مخکې باید هغوی ته فرصت ورکړل شي، څو افغانستان ته د بېرته ستنېدو د خطرونو په اړه خپلې اندېښنې بیان کړي.
