۸صبح، خوست: په خوست کې ځايي سرچینې وايي چې په دغه ولایت کې د ناچاوده سرګلولې په چاودنه کې یوې ماشومې او یوه ماشوم ژوند له لاسه ورکړی او یوه نجلۍ ټپي شوې ده.
سرچینو سهشنبه د وږي پر ۲۴مه ۸صبح ورځپاڼې ته وویل چې دا پېښه نن د خوست په «نمرو» سیمه کې شوې ده.
د سرچینو په خبره، په دې پېښه کې یوه ۱۰ کلن هلک او یوې ۱۰ کلنې او بلې ۱۲ کلنې نجلۍ ته مرګ ژوبله اوښتې ده.
سرچینې زیاتوي چې پېښه هغه مهال رامنځته شوه چې کله ماشومانو د ناچاوده سرګلوله ومونده او لوبې یې پرې کولې.
دا په داسې حال کې ده چې له جګړو پاتې ناچاوده توکي وخت ناوخت له خلکو په ځانګړې توګه له ماشومانو قرباني اخلي.
