۸صبح، کابل: په سویس کې د افغانستان سفیر نصیراحمد اندیشه وايي، تر څو چې د افغانستان نیمايي نفوس له عام ژونده بې برخې وي، په هېواد کې دوامدارو حللارو ته رسېدل ناشوني دي.
اندیشه دا څرګندونې چهارشنبه د تلې پر ۲۲مه د ملګرو ملتونو د کډوالو عالي کمېشنرۍ د اجرايي کمېټې په اووه اویایمه کلنۍ غونډه کې کړې دي.
هغه ویلي چې پر افغان ښځو او نجونو لګول شوي محدودیتونه کورنۍ موضوع نه ده چې د عملپالنې یا ملي حاکمیت په نوم له پامه وغورځول شي.
نوموړي ټینګار کړی چې دا محدودیتونه د بشري مرستو او د کډوالو د بېرته ستنېدو پر بهیر هم اغېز لري او ملګري ملتونه او نورې نړیوالې ادارې اړ باسي چې لنډمهالې حللارې غوره کړي.
اندیشه زیاته کړې چې د نویو محدودیتونو په لګېدو سره نړیوالې ادارې تل له بې برخلیکه حالت سره مخ وي او نه پوهېږي چې په راتلونکو ورځو کې نور څه ډول محدودیتونه ولګول شي.
نوموړي همداراز د ملګرو ملتونو د کډوالو عالي کمېشنرۍ د مالي سرچینو د کمښت په اړه اندېښنه څرګنده کړې او ویلي یې دي چې دغه بنسټ روان کال د مالي اړتیاوو یوازې ۳۵ سلنه ترلاسه کړې ده.
اندیشه له مرستهکوونکو غوښتي چې د بشردوستانه مرستو او د کډوالو د بیا ادغام پروګرامونو د بودیجې کمښت ته پاملرنه وکړي؛ ځکه د نوموړي په وینا، ښايي د دغو مرستو د کمېدو پایلې په راتلونکي کې د بېثباتۍ په بڼه بېرته راڅرګندې شي.
