۸صبح، کابل: د ملګرو ملتونو سرمنشي انتونیو ګوتېرېش په ۲۰۲۷ کال کې «د افغانستان د خپلواک څېړنیز میکانیزم» د پیاوړتیا لپاره ۳.۲ میلیونه ډالر بودیجه وړاندیز کړې ده.
نړیوالو رسنیو چهارشنبه د تلې پر ۲۲مه راپور ورکړی چې دا وړاندیز د عمومي اسمبلې پنځمې کمېټې ته وړاندې شوی دی.
دا بودیجه د فعالیتونو د پراختیا، د کارکوونکو د ګومارنې او د افغانستان لپاره د خپلواک څېړنیز میکانیزم د عملیاتي ملاتړ د برابرولو په موخه په پام کې نیول شوې ده.
دا میکانیزم په افغانستان کې له بشري حقونو د سرغړونو او نړیوالو جنایتونو اړوند اسنادو د راټولولو، خوندیتوب او تحلیل لپاره جوړ شوی.
ګوتېرېش د اغېزمنتیا د زیاتولو او بودیجوي اصلاحاتو په موخه، په افغانستان کې د ملګرو ملتونو د مرستندویه پلاوي (یوناما) په دفتر کې د ۶۰ بستونو د حذفولو وړاندیز هم کړی دی.
د راپور له مخې، د څېړنیز میکانیزم د بودیجې او د یوناما د کاري بستونو د کمولو اړوند وړاندیزونه لا تصویب شوي نه دي.
