د کندهار والي روح الله خانزداه وايي چې د کندهار جګړه سياسي او قومي اړخ لري.
نوموړي د چنګاښ په ۲۶مه نېټه په خبري ناسته کې وویل چې په کندهار کې ځيني امنیتي مسؤلین د قومي او سیاسي اړيکو له مخې پوستې خوشې کوي.
اخوا، د کورنیو چارو وزارت امنیتي مرستیال عبدالرحمن رحمان چې د کندهار د امنیت د ارزولو په موخه دغه ولایت ته تللی ویلي: کندهار ولایت به په هېڅ صورت د طالبانو لاس ته ور نه شي، ځکه د کندهار په نوم سره ټول افغانستان یادېږي.
د کورنیو چارو وزارت لوی معین زياته کړه چې، په ورستیو ورځو کې یې طالبانو ته سخته مرګ ژوبله اړولې او دا لړۍ به دوام ولري.
عبدالرحمن رحمان څرګنده کړه، چې د کندهار ولایت سقوط د ټول افغانستان سقوط دی، نو دوی به په هېڅ صورت طالبانو ته د کندهار ولایت د نیولو اجازه ور نه کړي.
بل لوري ته د کندهار والي وويل، په کندهار کې ټوله جګړه سیاسي ده او خلک د قوم پر اساس یو او بل ځای له سقوط سره مخ کوي. د خانزاده په وينا، په داسې حال کې، چې ځينو پوستو ته ان په څلورو ورځو هم وسله وال طالبان نه وي ورغلي خو هغه ځای افغان امنيتي ځواکونو پریښی وي.
روح الله خانزاده زیاته کړه، چې دی به هغه مشران ډېر ژر د کندهار اولس ته وروپېژني چې په تېرو شلو کلونو کې یې د کندهار د خلکو په نامه خپل جېبونه ډک کړي دي.
په کندهار کې په تېرو څو اونیو کې جګړو زور اخیستی، چې همهاله زیاتې کورنۍ له خپلو سیمو بې ځایه شوې او کندهار ښار ته یې پناه وړې ده.
له بلې خوا، د کندهار یو شمېر وکیلان وايي هغه دولتي کارکوونکي چې په دې وروستیو کې له هېواده تښتېدلي باید له دندو ګوښه او سزا ورکړل شي.
په ولسي جرګه کې د کندهار استازو سید احمد سېلاب، ګل احمد کمین او مقتدا مېران د چنګاښ په ۲۶مه په دغه ولایت کې خبري ناستې ته وویل چې موږ تل د خپل اولس ترڅنګ ولاړ یؤ او په هر وخت کې به یې دفاع کوو. د ولسي جرګې غړي ګل احمد کمین ویلي چې په کندهار کې د جګړې یو لوری د خلکو له کورونو د سنګر کار اخلي، خو بل لوری بیا پر همدغو کورونو چې عام خلک په کې اوسېږي بمباري کوي او په پايله کې د دواړو لوريو لخوا عامو وګړو ته زیان رسېږي.
د کندهار بل استازي سید احمد سېلاب وویل: هغه پوځي او ملکي مامورین چې په دې حساس وخت کې له کندهاره تښتېدلي دي، د دې ترڅنګ چې له دندو لیرې شي بايد سزا ورکړل شي.
د کندهاريانو بل استازي مقتدا مېران وويل، دا چې ولایتي ادارې د موټر سیکلونو د ګرځېدو او همدارنګه د شپې لخوا د خلکو پر تګ راتګ بندیز لګولی، دغه ګام به د کندهار د امنيت په ښه والي کې اغېزناک ثابت شي.
په ولسي جرګه کې د کندهار استازي داسې مهال خلکو ته ډاډ ورکوي چې د کندهار ښار درې حوزې طالبانو نیولې او په ځینو نورو برخو کې هم جګړه روانه ده.
د دې ترڅنګ د دغه ولایت له ۱۷ ولسوالیو يوازې دوه ولسوالۍ د امنیتي او دفاعي ځواکونو په ولکه کې دي.
تر ټولو ډېر کتل شوي مطالب
-
خلیلزاد: امریکا دې د افغانستان د پاشل کېدو د مخینوي په موخه له طالبانو سره تعامل وکړي
-
د امریکا د بهرنیو چارو وزیر سمرقند ته تللی
-
داعش خراسان؛ په تېرو ۹ کلونو کې د رهبرۍ جوړښت او لړۍ
-
په بادغیس کې نښته؛ سرچینې د دوو طالبانو د وژل کېدو خبر ورکوي
-
د افغان کډوالو د اېستلو دوام؛ پرون نږدې ۱۰۰۰ کورنۍ هېواد ته راستنې شوې
پادکست
د امتياز څښتن: سنجر سهيل
اجرائیوي رئیس: پروېز کاوه
د کتونکې ډلې مشر: بهیر
پته: کابل، افغانستان