په پروان کې د زلزلې له امله د استوګنې ۱۷۰ کورونه ویجاړ شوي دي
۸صبح، پروان: په پروان کې ځایی سرچینې وایی چې په هېواد کې د وروستۍ زلزلې له امله د دغه ولایت په بېلابېلو سیمو کې لږ تر لږه ۱۷۰ د استوګنې کورونه ویجاړ شوی دی.
سرچينې د شنبې په ورځ (وري ۵) ، په پروان کې د طالبانو له طبيعي پېښو سره د مبارزې رياست د ساحوي کارکوونکو له خولې وويل، چې دغې زلزلې تر ډېره د مرکز او سيدخېلو، شينوارو او سياه ګرد ولسواليو اوسېدونکي زيانمن کړي دي.
د سرچينې د معلوماتو له مخې، له دې جملې څخه په سيدخېلو ولسوالۍ کې د استوګنې سل کورونه ويجاړ شوي دي.
له دې زلزلې وروسته د پروان په بېلابېلو سیمو کې لږ تر لږه ۱۵ کسان ټپیان شوي دي.
د يادونې وړ ده، چې د سه شنبې په شپه (وري۱) د ريختر په کچه د ۶.۵ درجې زلزلې د پاکستان او هند په ګډون د هېواد ځينې برخې ولړزولې.
د دغې زلزلې مرکز د بدخشان په جرم ولسوالۍ کې اعلان شوی او ژوروالی یې ۱۸۷ کیلومتره و.
د طالبانو له پېښو سره د مبارزې وزارت هم اعلان کړی، چې تر زلزلې وروسته په ټول هېواد کې تر ۸۰۰ ډېر کورونه په جزئي او بشپړ ډول ويجاړ شوي دي.
