۸صبح، کابل: د بشري حقونو د څار سازمان مخکېني اجرايي مشر کنت راث وايي چې افغانستان ته د افغانانو جبري ستنول، هغوی د شکنجې او ځورونې له ګواښ سره مخ کوي.
راث چهارشنبه د تلې پر ۲۲مه په اېکس پاڼه کې لیکلي چې فرانسې له طالبانو سره د افغانانو د ستنولو لپاره «تخنیکي» خبرې پیل کړې دي.
نوموړي دا تګلاره خطرناکه بللې او خبرداری یې ورکړی چې ښايي د افغانانو جبري ستنول د هغوی امنیت او بنسټيزو حقونو جدي پایلې ولري.
راث ټينګار کړی چې دا تګلاره د بشري حقونو په برخه کې د فرانسې له نړیوالو ژمنو سره په ټکر کې ده.
دا په داسې حال کې ده چې د بشري حقونو په څار سازمان کې د افغانستان برخې څېړونکې فرشتې عباسي هم ویلي چې د افغانانو د ایستلو لپاره له طالبانو سره د فرانسې تعامل د دغه هېواد په تګلاره کې خطرناک بدلون دی.
