خلیلزاد له غني او عبدالله سره په جلا جلا ډول وکتل

د افغانستان د سولې لپاره د امریکا ځانګړي استازي زلمي خلیلزاد د کب په ۲۵مه نېټه کابل ته په سفر کې له ولسمشر محمد اشرف غني او د ملي روغې جوړې د عالي شورا له رییس عبدالله عبدالله سره په جلاجلا ډول وکتل.
د ولسمشرۍ دفتر د اعلان له مخې، خلیلزاد په دغه کتنه کې د خپلو وروستیو سفرونو او فعالیتونو په اړه ولسمشر غني ته معالومات ورکړي دي.
ارګ وايي چې دواړو لوریو د سولې بهیر او په دې اړه د نورو اقداماتو په هکله هم خبرې اترې وکړې.
ښاغلي خلیلزاد د ملي روغې جوړې د عالي شورا له رییس عبدالله عبدالله سره هم په سپېدار ماڼۍ کې کتلي دي.
د سپېدار د رپوټ پر بنسټ، دواړو لوریو د افغانستان د سولې په اړه د وروستیو پرمختګونو او بدلونونو، د ملي روغې جوړې د عالي شورا د مشرتابه کمیټې د وروستۍ ناستې د تصمیمونو، د افغانستان د سولې په هکله د مسکو او ترکیې د غونډو، د دوحې د مذاکراتو، د خبرو بهیر د چټکتیا او تاوتریخوالي د کمښت په اړه خبرې اترې وکړې.
خلیلزاد چې کابل ته راغلی، په دوحه کې يې د قطر له چارواکو، د دولت او طالبانو له مرکچي پلاویو او ترکي چارواکو سره کتلي دي.
زلمي خلیلزاد همداراز پاکستان ته سفر وکړ او ددغه هېواد له یو شمېر سیاسي او پوځي چارواکو سره یې کتنه او خبرې اترې کړې دي.
د افغانستان د سولې په چارو کې د امریکا ځانګړي استازي په خپل مخکیني سفر کې افغان دولت او یو شمېر سیاستوالانو ته یوه طرحه وسپارله چې د یوه انتقالي دولت احتمالي سناریوګانې پکې اټکل شوې وې.
دا طرحه په کابل کې له بېلابېلو غبرګونونو سره مخامخ شوې ده. د ملي روغې جوړې عالي شورا هم په یوه ناسته کې دا طرحه ارزولې ده.