د افغانستان ملي دفاع وزارت وايي چې په ۲۴ ساعتونو کې د هېواد په ۱۵ ولايتونو کې د افغان امنيتي او دفاعي ځواکونو سره په جګړه کې ۲۳۴ طالب جنګيالي وژل شوي او ۱۰۳ تنه نور یې ټپيان دي.
د دغه وزارت لخوا په خپرې شوې خبرپاڼه کې راغلي چې، په همدې موده کې همداراز د طالبانو يو اندازه وسلې او مهمات هم د امنيتي او دفاعي ځواکونو لاس ته ورغلي دي.
خبرپاڼه زياتوي، دغه طالبان په لوګر، ننګرهار، پکتیکا، خوست، کندهار، زابل، فاریاب، بلخ، سمنګان، هلمند، تخار، بغلان، پروان، کندز او کابل ولایتونو کې مړه او ټپيان شوي دي.
په ورته وخت کې په افغانستان کې د جګړې د زیاتېدو او د يو شمېر ولسواليو د سقوط په غبرګون کې د امريکا دفاع وزارت ويلي چې امريکايي قوماندانان د افغانستان وضعيت په ورځيني ډول څاري.
دا په داسې حال کې ده چې په دې وروستيو کې د هېواد په ګوټ ګوټ او په ځانګړي ډول شمالي او شمال ختيځو ولايتونو کې د افغان امنيتي او دفاعي ځواکونو او طالبانو ترمنځ جګړو زور اخيستی او ګڼ شمېر هېوادوال له دې امله اندېښمن دي.
د راپورونو له مخې، په تېرو څو اونيو کې د هېواد په شمال کې له ۴۰ زیاتې ولسوالۍ د طالبانو لاس ته ورغلې خو په ورته وخت کې ملي دفاع وزارت د ځينو ولسواليو د بېرته نيولو خبر ورکړی دی. ملي دفاع وزارت ویلي چې د بلخ ولايت بلخ ولسوالي د چنګاښ په لومړۍ نېټه د افغان امنيتي او دفاعي ځواکونو او طالبانو ترمنځ له جګړې وروسته د افغان ځواکونو لاس ته ورغله.
له بلې خوا، د کندهار ولايت پر میوند ولسوالۍ له تېرې یوې میاشتي راهيسې درنه جګړه روانه ده چې د چنګاښ په لومړۍ نېټه له سختې جګړې وروسته د دې ولسوالۍ مرکز او د امنیه قومندانۍ ودانۍ د طالبانو لاس ته ورغله.
خو د دولتي ځواکونو په هوایي برید کې ۳۲ طالبان وژل شوي او یو شمېر نور ټپيان دي.
په کندهار کې امنیتي مسؤلینو لا تر دې دمه په دې اړه په رسمي توګه څه نه دي ویلي.
په ورته وخت کې طالبانو رسنیو ته په استول شوې خبرپاڼه کې ویلي چې د میوند ولسوالي یې له سپکو او درنو وسلو سره یو ځای نیولې ده، خو د خپلو تلفاتو په اړه یې څه نه دي ویلي.
تر ټولو ډېر کتل شوي مطالب
-
په غور کې په بوږنوونکې بڼه د نوریې وژنه؛ هغه چې د خپلو ماشومانو په مخکې شکنجه او ووژل شوه
-
سرچینې: طالبانو د امید سبز ښارګوټي د اوسېدونکو کورونو ته کرایه ټاکلې ده
-
د ارغند ورور: د طالبانو ښاروالۍ د «ارغند واټ» لیکدړه لرې کړه
-
په بدخشان کې واورې ورېدنې او شدید ساړه د درېیو ماشومانو ژوند اخیستی
-
پرون له زرو څخه زیاتې کډوالې کورنۍ هېواد ته راستنې شوې
پادکست
د امتياز څښتن: سنجر سهيل
اجرائیوي رئیس: پروېز کاوه
د کتونکې ډلې مشر: بهیر
پته: کابل، افغانستان