۸صبح، کابل: د ناروې د کډوالو شورا (NRC) د افغانستان په ختیځ کې له زلزلهځپلو سره خواخوږي ښودلې او ویلې یې دي چې زړونه یې د دې پېښې له زیانمنو سره دي.
نوموړې شورا دوشنبه د وږي پر ۱۰مه په خپله اېکسپاڼه کې لیکلي چې د دې طبیعي پېښې په پایله کې څه باندې ۶۰۰ کسان مړه شوي او له ۱۵۰۰ ډېر ټپيان دي.
د ناروې د کډوالو شورا زیاته کړې چې په کونړ او ننګرهار څو کلي بشپړ ویجاړ شوي دي.
د یاد بنسټ په خبره، د ناروې د کډوالو شورا ډلې اغېزمنو سیمو ته رسېدلې او د اوښتو زیانونو او بېړنیو مرستو پر ارزولو بوخت دي.
له دې وړاندې د کډوالو په چارو کې د ملګرو ملتونو عالي کمېنشرۍ (UNHCR) ویلي و چې په افغانستان کې وروستیو زلزلو ګڼې سیمې ویجاړې کړې، خلک سرپناه نه لري او مرستو ته بېړنۍ اړتیا ده.
ځينو نورو هېوادونو او نړیوالو بنسټونو هم په افغانستان کې له زلزلهځپلو سره د مرستې لپاره د چمتوالي اعلان کړی دی.
دا په داسې حال کې ده چې د رویټرز خبري اژانس د راپور له مخې، په افغانستان کې د ۲۰۲۵ کال له پیله تر اوسه لږ تر لږه پنځه زلزلې شوې دي.
