۸صبح، کابل: د ملک سلمان مرستندویه بنسټ په کونړ کې له زلزلهځپلو کورنیو سره د بېړنۍ سرپناه مرسته کړې ده.
په کابل کې د سعودي عربستان سفارت پنجشنبه د لیندۍ پر ۶مه په یوې خبرپاڼې کې لیکلي چې د عربستان د پاچا ملک سلمان بنسټ پر زلزله ځپلو کورنیو ۳۰۰ خیمې، ۱۵۰۰ کمپلې او د پخلنځي ۳۰۰ کڅوړې وېشلې دي.
د خبرپاڼې له مخې، دا مرستې له زلزلهځپلو سره د بېړني غبرګون پروژې په چوکاټ کې شوې دي.
په خبرپاڼې کې راغلي چې دا مرستې یې له افغاني سرې میاشتې سره په همغږۍ وېشلې دي.
نوموړي بنسټ څه موده وړاندې هم د افغانستان په شمال کې پر زلزلهځپلو کورنیو ۳۰۰ کارتنه خرما او نور خوراکي توکي وېشلي وو.
