۸صبح، کابل: د ملګرو ملتونو له ماشومانو د ملاتړ صندوق (یونیسف) اعلان کړی چې د افغانستان په ختیځ کې زلزله ځپلي ماشومان لا هم ملاتړ ته اړتیا لري.
نوموړي سازمان دوشنبه د لیندۍ پر ۱۰مه راپور ورکړی چې په اغېزمن شویو سیمو کې څه باندې شپږ زرو ماشومانو ته د زدهکړو ۲۰۰ لنډمهالي ځایونه برابر شوي دي.
د راپور له مخې، د افغانستان په ختیځ کې له زلزلې درې میاشتې تېرېږي چې له کبله یې نږدې دوه زره کسان مړه شول او لا هم ګڼ اغېزمن بشري مرستو ته اړتیا لري.
د ملګرو ملتونو د بشري استوګنې پروګرام هم ویلي چې د هغه ښوونځي د بیا رغولو په حال کې دی چې دوه کاله وړاندې د هرات په زلزله کې ویجاړ شو او ۵۰۰ زده کوونکي یې له خپلو درسونو بې برخې کړل.
د یادونې ده چې د افغانستان په بېلابېلو ولایتونو کې د وروستیو زلزلو په پایله کې د ځاني زیان ترڅنګ ګڼ مالي زیانونه اوښتي دي.
