په اسټرالیا کې د افغانستان سفارت اعلان کړی چې پرون یې د افغانستان د سولې بنسټ او یو شمېر نورو بنسټونو په همکارۍ د نوروز جشن او د کوچني اختر د نمانځنې په مناسبت په کانبرا ښار کې د اسټرالیایي چارواکو، ډیپلوماتانو، فرهنګپالو او په اسټرالیا کې د یو شمېر مېشتو افغانانو په حضور سره مراسم ترسره کړې دي. دغه سفارت ویلي چې مراسمو د بېلابېلو کلتوري پروګرامونو، تفریحي فعالیتونو، د «زرګونه لمرونه» تر سرلیک لاندې د افغانستان د ښځو د ملاتړ د کمپاین او د سمنک پخولو د دود پر ځای کولو سره داسې فضا رامنځته کړه چې د خوښۍ، یووالی او د افغانستان د کلتور او هویت ښکلی انځور یې نندارې ته وړاندې کړ.
د دې غونډې تنظیموونکو ویلي چې دا پروګرام د اسټرالیایي چارواکو، د ډیپلوماتیکو پلاوو د غړو، د مدني بنسټونو د استازو، د فرهنګپالو او په اسټرالیا کې د مېشتو ګڼو افغانانو په حضور کې ترسره شوی دی. د هغوی په وینا، د مراسمو فضا په ښه ډول د کډوالۍ په شرایطو کې د افغانانو یووالی، ګډ هویت او کلتوري اړیکې منعکسې کړې دي.
په استټرالیا کې د افغانستان سفیر وحیدالله ویسي او د افغانستان د سولې بنسټ سیمهییز مسوول نادر صیقل دغه مراسم په خپلو ویناوو سره پرانېستل. دغه راز، د اسټرالیا د فدرالي پارلمان غړی جولیان هیل د تابعیت وزیر او د افغانستان او اسټرالیا د خلکو د دوستۍ ډلې مشر پیټر کین، د کانبرا د شورا رئیس او د کانبرا د حکومت استازی برنډن نېلسن او د ایالتي نړیوالو اړیکو رئیس هم په دغو مراسمو کې ویناوې وکړې.
ویناوالو د څو زره کلن میراث په توګه د نوروز پر ارزښت ټینګار وکړ او هغه یې د کلتورونو ترمنځ د اړیکو نښه او د افغانستان د خلکو د هویت له مهمو عناصرو وباله. هغوی دغه راز د افغانستان روان وضعیت په ځانګړې توګه د ښځو او نجونو پر وړاندې پر محدودیتونو خبرې وکړې او د نړیوالې ټولنې له لوري یې د افغانستان د خلکو، په ځانګړې توګه د ښځو، د اساسي حقونو د ملاتړ پر اړتیا ټینګار وکړ. پردې سربېره، د سیمې د وضعیت او په منځني ختیځ کې د تاوتریخوالي د زیاتېدو په تړاو اندېښنې هم مطرح شوې او د سولې، زغم او د ملکي وګړو د ژوند د ساتنې پر اهمیت ټینګار وشو.
د افغانستان سفیر وحیدالله ویسي د پاکستان له لوري په کابل کې د روږدو د درملنې پر مرکز هوايي بریدونو ته چې له امله یې سلګونه کسان وژل شوي او ټپیان شوي دي، اشاره وکړه او هغه یې وغندل.
«زرګونه لمرونه»؛ له افغان ښځو سره پیوستون
دغه راز، په دغه پروګرام کې د «زرګونه لمرونه» کمپاین ګډونوالو ته ور وپېژندل شو او اعلان وشو چې دا سمبولیک نوښت د افغان ښځو او نجونو د ملاتړ لپاره پیل شوی دی. پر دې سربېره ، د اسټرالیا له بېلابېلو سیمو د دغه کمپاین په د یووالي سلګونه پیغامونه نندارې ته وړاندې شوي او له ګډونوالو غوښتنه شوې چې د خپلو پیغامونو په لیکلو سره په دې ګډ حرکت کې برخه واخلي.
په کانبرا کې د افغانستان سفارت اعلان کړی چې د دغو مراسمو کلتوري برخه د بېلابېلو او زړهراښکونکو پروګرامونو په ترسره کېدو سره تنظیم شوې وه. د دغو مراسمو له مهمو برخو د پنځو هنرمندانو له لوري د ژوندۍ موسیقۍ اجرا، اتڼ او د پېژندل شوي هنرمند شریف ساحل له لوري د سمنک ځانګړې سندرې ته اشاره کېدای شي. د دغه سفارت په وینا، تفریحي فعالیتونو لکه د رسۍ کشولو سیالي په درېیو برخو (ماشومانو، ښځو او نارینه وو) او د ماشومانو لپاره ځانګړو پروګرامونو هغوی ته خوښ او صمیمي چاپېریال برابر کړی و. دغه راز د سفارت انګړ د هفتسین او هفتمیوې په جوړولو، د نوروزي خوړو په وړاندې کولو، د لاسي صنایعو او افغاني غالیو په نندارې او د نوروزي بازارګوټي په جوړېدو سره د افغانستان د کلتور او اصالت ښکلی انځور وړاندې کړ.
د افغانستان سفارت اعلان کړی چې ګډونوالو د سمنک پخولو په دودیزو مراسمو کې هم برخه واخیسته او د دې لرغوني رسم په ترسره کولو سره یې د یووالي او هیلهمندۍ فضا نندارې ته وړاندې کړه. د دغو مراسمو په پای کې د پچې اچونې پروګرام ترسره شو چې د ګډونوالو له تاوده هرکلي سره مخ شو. دغه سفارت دغه راز د ساوا، آرسياېس او نورو بنسټونو او د پروګرام له تنظیموونکو مننه کړې ده.
