۸صبح، کابل: د ملګرو ملتونو د بشري مرستو د همغږۍ دفتر (اوچا) ویلي چې د بشري بودیجې کمښت، حیاتي او اړینو خدمتونو ته د میلیونونو افغانانو لاسرسی له خنډ او ننګونو سره مخ کړی دی.
دغه بنسټ پنجشنبه د وږي پر ۲۶مه، پر خپله ایکس پاڼه لیکلي چې د بشري بودیجې په کمېدو سره په ټول افغانستان کې د اساسي خدمتونو د وړاندې کولو په برخه کې تشې مخ پر ډېرېدو دي.
اوچا ویلي چې دغو تشو د خوړو، روغتیایي پاملرنو، زدهکړو، تغذیې، پاکو اوبو او سرپناه په څېر برخې اغېزمنې کړې دي.
دغه بنسټ زیاته کړې چې په ټول افغانستان کې میلیونونه کسان له مخ پر ډېرېدونکو بشري اړتیاوو سره مخ دي.
اوچا له نړیوالې ټولنې غوښتي چې د افغانستان د بشري ناورین د حل لپاره بیړني ګامونه پورته کړي.
