د بدخشان د مرکز فیضاباد ښار د شپږمې ناحیې اوسېدونکي په دې سیمه کې د سړک جوړولو پروژې له درېدو شکایت کوي. هغوی وايي چې د دغه سړک د جوړېدو لپاره څه باندې سل کورونه او دوکانونه ویجاړ شوي، خو د پروژې کار په نیمایي کې درول شوی او د سړک ځینې برخې لا هم نیمګړې پاتې دي. دا اوسېدونکي وايي چې طالبانو د سړک یوه وړه برخه جوړه کړې او او نورې برخې یې لا هم خاورینې او ویجاړې دي.
د دشت شهدا یو تن اوسېدونکی خیرالدین (مستعار نوم) وايي چې طالبانو د دغه سړک د جوړولو په پلمه د هغه له نیمایي ډېر کور ویجاړ کړی دی. هغه زیاتوي: «په ټول عمر کې مې د یوه کور د جوړولو وس پیدا کړ، چې هغه یې هم د دې سړک لپاره خراب کړ، خو سړک هم جوړ نه شو. هم سړک لاړ او هم زما کور.»
د دشت شهدا بل اوسېدونکی محمدیار (مستعار نوم) وايي چې د دې سړک کار خورا ورو پر مخ لاړ او د پروژې د پلي کېدو پر مهال ګرد او دوړو شاوخوا کورنیو ته خورا ډېرې ستونزې رامنځته کړې دي.
دا سړی زیاتوي چې د سړک جوړولو لپاره د یو شمېر کورنیو کورونه نړول شوي، خو اوس د پروژې کار نیمګړی پاتې دی او د خلکو غوښتنو ته هم هېڅ روښانه ځواب نه دی ورکړل شوی. د سیمې د دغه اوسېدونکي په وینا، طالبانو د خلکو د کورونو او دوکانونو د نړولو په بدل کې هغوی ته هېڅ تاوان نه دی ورکړی.
محمدیار وايي: «د کور مخې ته مې څو دوکانونه جوړ کړي وو، هره میاشت به مې لږه کرایه ترې اخیستله او پر خپل روزګار مې لګولې، خو اوس هم دوکانونه خراب شول او هم زما د کور نیمایي برخه. تمه مو درلوده چې طالبان به د تاوان پیسې راکړي، خو چا راسره په دې اړه هېڅ مرسته ونه کړه.»
د دې سیمې یو بل اوسېدونکی وايي چې په پام کې وه، د دغه سړک د جوړېدو بودیجه د یو شمېر سوداګرو او د کانونو د خصوصي شرکتونو له خوا ورکړل شي. د هغه په وینا، څو شرکتونو او سوداګرو د پروژې د لګښت مسوولیت اخیستی و، خو د کار پر مهال یې له تمویله لاس واخیست او پروژه نیمګړې پاتې شوه.
د فیضاباد دا اوسېدونکی وايي: «موږ خوشحاله وو چې بالاخره به له خاورو او دوړو خلاص شو او سړک به جوړ شي، خو اوس ویجاړۍ تر پخوا ډېرې شوې دی. کان کیندونکو هم ویلي چې د دې سړک د بشپړولو لپاره نورې پیسې نه ورکوي.»
طالبانو د ۱۴۰۴ کال د مرغومي پر ۲۸مه، د بدخشان د اطلاعاتو او کلتور ریاست په دوه اونیزه خپرونه کې د دغې پروژې د پیل خبر ورکړی و چې ارزښت یې ۲۰ میلیونه افغانۍ بلل شوی و. د دغه راپور له مخې، ټاکل شوې وه، چې د دې پروژې لګښت د طالبانو د کانونو او پټرولیم د پخواني رییس شفیقالله حفیظي، څارنوال حبیبشاه، عبدالهادی صراف، حاجی فواد او ارباب نعیم له خوا ورکړل شي.
د ځایي سرچینو په وینا، د پروژې یوازې دوو تمویل کوونکو ژمنه شوې پیسې ورکړې دي او نور تمویل کوونکي د لګښت ورکولو ته حاضر نه دي.
د سیمې یو سپین ږیری عبدالستار (مستعار نوم) وايي چې دی او د خلکو یو شمېر استازي د دې پروژې د بشپړولو لپاره اړوندو ادارو ته ورغلي، خو غوښتنو ته یې پاملرنه نه ده شوې.
دا سړی وايي: «د سړک د پوره کولو لپاره ریاست په ریاست وګرځېدو، خو هیڅوک حاضر نه دي خبرې راسره وکړي یا زموږ غوښتنې ته غوږ ونیسي. دا پروژه د شفیقالله حفیظي په نوښت پیل شوې وه، خو د کانونو او پټرولیم له ریاسته د هغه په تبدیلېدو سره نیمګړې پاتې شوه.»
د عبدالستار په وینا، کله چې هغوی د کانونو او پټرولیم له پخواني رییس او د بدخشان د کرنې او مالدارۍ له اوسني رییس شفیقالله حفیظي وغوښتل چې د دغې پروژې په بشپړولو کې مرسته وکړي، هغه په ځواب کې وویل: «که له پخوانۍ دندې ګوښه شوی نه وای، ما په خپله پروژه بشپړوله، خو اوس یې توان نه لرم.»
د دغې پروژې له پیله د څو میاشتو په تېرېدو سره، د سړک ځینې برخې لا هم نیمې پاتې دي او نړول شوي کورونه او دوکانونه هم بېرته نه دي جوړ شوي. د سیمې اوسېدونکي وايي تر هغې چې سړک بشپړ نه شي، د تګ راتګ ستونزې او خاورې او دوړې به همداسې دوام ولري.
