۸صبح، کابل: د پاکستان د پوځ ویاند احمد شریف چودري، ویلي دي چې په افغانستان کې لسګونه ترهګرې ډلې فعالیت کوي او د طالبانو تر واک لاندې خاوره کاروي.
چودري چهارشنبه د وږي پر ۲۵مه، له العربیه سره په مرکه کې ویلي چې طالبانو خپله تر واک لاندې سیمه دغو ډلو ته د جلب او جذب، روزنې، تجهیز او په پاکستان او سیمه کې د بېلابېلو ترهګریزو بریدونو د سمبالښت لپاره په واک کې ورکړې ده.
نوموړي د ملګرو ملتونو راپورونو ته په اشارې سره، القاعده، د داعش خراسان څانګه، تحریک طالبان پاکستان او د بلوچستان ازادي غوښتونکی پوځ په افغانستان کې د فعالو ډلو په توګه یاد کړي دي.
چودري ټینګار کړی چې پاکستان به د هغو بریدونو پر وړاندې له ترهګرۍ سره مبارزې ته دوام ورکړي چې د ده په وینا له افغانسانه سرچینه اخلي.
د پاکستان د پوځ ویاند ویلي چې اسلاماباد به د مشروع دفاع د حق پر بنسټ له خپلو وګړو ساتنه وکړي.
