۸صبح، غزني: په غزني کې سرچینې وايي چې د دغه ولایت په جغتو ولسوالۍ کې خلکو په شخصي لګښت یو روغتیايي مرکز جوړ کړی دی.
سرچینو سهشنبه د تلې پر ۲۱مه له ۸صبح ورځپاڼې سره په خبرو کې وویل چې دا روغتیايي مرکز د جغتو ولسوالۍ د «بالاسر سراب» په سیمه کې جوړ شوی دی.
د سرچینو په وینا، د دغه روغتیايي مرکز پر جوړولو دوه نیم میلیونه افغانۍ لګښت راغلی.
دا روغتیايي مرکز ۱۲ خونې او اړوندې څانګې لري او پر ۳۰۰ متر مربع ځمکه باندې جوړ شوی دی.
د سیمې اوسېدونکي وایي چې مخکې په سیمه کې د روغتیايي مرکز د نشتوالي له امله له سختو ستونزو سره مخ و او د ناروغانو د درملنې لپاره مجبوره و چې روغتیايي مرکزونو ته د رسېدو لپاره لسګونه کیلومتره لار ووهي.
د سرچینو په وینا، دا درېیم روغتیايي مرکز دی چې په غزني کې د روانې میاشتې په اوږدو کې د خلکو په شخصي لګښت جوړېږي.
