۸صبح، کابل: د ملګرو ملتونو د ماشومانو د ملاتړ صندوق (یونیسف) ویلي چې له ۲۰۲۱ کاله تر اوسه په افغانستان کې څه باندې ۲.۶ میلیونه نجونې له زدهکړو بې برخې شوې دي.
نوموړي بنسټ چهارشنبه د تلې پر ۲۲مه راپور ورکړی چې محدودیتونو له نجونو د ښوونې فرصت اخیستی او ډېرې یې کورناستې کړې دي.
یونیسف په خپل راپور کې د هغو نجونو وضعیت ته اشاره کړې چې له شپږم ټولګي وروسته د زدهکړو له دوامه پاتې دي او اوس خپل ډېر وخت په کور کې تېروي.
د راپور له مخې، ځينو نجونو د ښوونځيو د تړل کېدو له امله د زدهکړو د دوام او د ډاکټرۍ په څېر مسلکونو ته د رسېدو هیلې له لاسه ورکړې دي.
یاد سازمان زیاته کړې چې له ښوونځيو د نجونو محرومېدل، د هغوی پر رواني وضعیت هم اغېز کړی او ترمنځ یې د یوازیتوب، ګوښهوالي او ناهیلۍ احساس زیات شوی دی.
یونیسف ویلي چې لا هم په افغانستان کې د نجونو او هلکانو له لومړنیو زدهکړو او ښوونیزو پروګرامونو ملاتړ او د ښوونځیو په جوړولو او بیارغولو، د ښځینه ښوونکو د روزنې او د ښوونیزو توکو په برابرولو کې همکاري کوي.
