۸صبح، کابل: د افغانستان لپاره د بریټانیا سفارت شارژدافیر، رابرټ ډیکسن په کابل کې د طالبانو د فرمانونو او حکمونو د څار ریاست (پخوانۍ لویې څارنوالۍ) پر کارکوونکو ځانمرګی برید غندلی دی.
ډیکسن سهشنبه د وږي پر ۱۳مه په اېکس ټولنیزه شبکه کې لیکلي چې هېوادوال تر کلونو ناکرارۍ وروسته، سوکالۍ او امن ته اړتیا لري.
هغه د کابل پروني برید د قربانیانو له کورنیو سره خپله خواخوږي څرګنده کړې ده.
تېره ورځ (دوشنبه، وږي ۱۲مه) مازدیګر شاوخوا ۴:۱۵ یو ځانمرګي بریدګر د طالبانو د فرمانونو او حکمونو د څار ریاست پر کارکوونکو د رخصتۍ پرمهال ځان ته چاودنه ورکړه.
طالبانو د دغه برید قربانیان د یوې ښځې په ګډون شپږ وژل شوي او ۱۲ ټپیان اعلان کړي دي.
ورته مهال، ځينو سرچینو ۸صبح ورځپاڼې ته ویلي چې په دې چاودنه کې لږ تر لږه ۱۱ کسان وژل شوي او ۱۵ نور ټپيان دي.
تر اوسه د دې چاودنې مسوولیت چا منلی نه دی.
په کابل ښار کې دا چاودنه داسې مهال شوې چې طالبان پرلپسې د سراسري امنیت ادعا کوي.
