۸صبح، هرات: په هرات کې یو شمېر نجونې د طالبانو د محدودیتونو پر دوام اندېښنه څرګندوي او وایي، چې د دوی د ژوند شرایط او په ټولنه کې یې حضور تر پخوا لا ستونزمن شوی دی.
دغو نجونو شنبه د چنګاښ پر ۲۷مه، ۸صبح ورځپاڼې ته وويل، چې د چادرۍ د نه اغوستو په تور د ښځو د نیولو له پیلېدو وروسته، په خلکو کې وېره او ناارامي لا هم پر خپل ځای پاتې ده او د کورنیو محدودیتونه هم پرې زیات شوي دي.
دوی وایي، چې شته محدوديتونو د دوی د ژوند پر ورځنیو چارو، ټولنیزو فعالیتونو او رواني وضعیت منفي اغېز کړی او د روانو فشارونو له امله پر خپګان اخته شوې دي.
ویل کېږي، چې په هرات کې یو شمېر کارکوونکې ښځې او سوداګرې هم په خپلو اقتصادي فعالیتونو کې له ډېرو ستونزو سره مخ شوې دي او د شته محدودیتونو او اندېښنو له امله نه شي کولای خپل کارونه په اسانۍ سره پرمخ یوسي.
دا څرګندونې داسې مهال کېږي، چې طالبانو په وروستیو اوونیو کې په هرات کې د خپلې خوښې د حجاب د نه مراعتولو په تور د ښځو او نجونو د نیولو لړۍ پیل کړې؛ هغه اقدام چې د هغوی پر وړاندې یې محدودیتونه او اندېښنې لا زیاتې کړې دي.
