۸صبح، کاپیسا: ځایي سرچینې وايي چې د کاپیسا ولایت په تګاب ولسوالۍ کې د وسلهوالو له خوا د درېیو ښځو په ګډون د یوې کورنۍ څلور غړي وژل شوي دي.
سرچینو دوشنبه د وږي پر ۳۰مه له ۸صبح ورځپاڼې سره په خبرو کې وویل چې دا پېښه تېره شپه شاوخوا ۱:۰۰ بجې د تګاب ولسوالۍ اړوند په «ببرخواجه» کلي کې شوې ده.
د سرچینو په وینا، وسلهوالو د دغې کورنۍ د څلورو غړو تر ویشتلو او وژلو وروسته له سیمې تښتېدلي دي.
سرچینې زیاتوي چې تر اوسه د دغې پېښې لامل او انګېزه څرګنده شوې نه ده.
په کاپیسا کې د طالبانو امنیه قوماندانۍ هم دا پېښه تایید کړې، خو د دغې پېښې د څرنګوالي په اړه یې نور جزییات نه دي ورکړي.
دا پېښه په داسې حال کې کېږي چې هېوادوال په بېلابېلو ولایتونو کې د جنايي پېښو او هدفي وژنو له زیاتېدو شکایت کوي.
پرون هم سرچینو په بادغیس کې د یوه ډاکټر د وژل کېدو، په کابل کې د یوه ځوان د قتل، په فراه کې د یوه بل ځوان د زندۍ کېدو او د هرات ولایت په غوریان ولسوالۍ کې د دوو ماشومانو د مړو د موندل کېدو خبر ورکړی و.
