۸صبح، کابل: طالبانو ادعا کړې چې په لومړي ځل یې د پکتیا ولایت د زرمت ولسوالۍ او د مرکز شاوخوا سیمو په یو شمېر کلیو کې د ۱۰۵۰ کورنیو لپاره برېښنا ته د لاسرسي زمینه برابره کړې ده.
د طالبانو تر کنټرول لاندې خبري اژانس یکشنبه، د وږي پر ۸مه راپور ورکړی چې په پکتیا کې دغه شمېر کورنۍ په لومړي ځل د برېښنا له شبکې سره نښلول شوې دي.
د راپور له مخې، د طالبانو تر ادارې لاندې د افغانستان برېښنا شرکت ادعا کړې چې په دې پروژه کې د وېش ۹ ترانسفارمرونو، ۵۷۵ کانکریټي پایې او د ۲۰ او ۴۰ کیلوولټه برېښنا د ۶۵ کیلومتره مزو نصبول شامل دي.
د طالبانو دې ادارې همداراز ادعا کړې چې دا پروژه د ۴۱ میلیونه افغانیو په لګښت عملي شوې ده.
دا په داسې حال کې ده چې د طالبانو له بیا واکمنېدو وروسته، په کابل او د هېواد په ځینو ولایتونو کې د برېښنا د پراخو پرچاويو او د شپې او ورځې په ډېرو ساعتونو کې د برېښنا د نشتوالي په اړه شکایتونه زیات شوي دي.
