۸صبح، کابل: طالبانو ویلي چې د روان کال په لومړیو درېیو میاشتو کې د هرات – خواف د اوسپنې پټلۍ له لارې څه باندې ۳۰۰ زره ټنه سوداګریز توکي افغانستان ته وارد شوي دي.
باختر خبري اژانس شنبه د زمري پر ۳مه راپور ورکړی چې د هرات د سوداګرۍ او پانګونې خونې له خوا د وړاندې شویو شمېرو له مخې، د افغانستان او ایران ترمنځ په وروستیو میاشتو کې پر دغه مسیر سوداګریزه راکړه ورکړه ډېره شوې ده.
د راپور له مخې، د لېږد لګښتونو کمېدل او د ترانسپورټ بهیر چټکتیا هغه مهم لاملونه دي چې سوداګر یې د هرات – خواف رېل پټلۍ کارولو ته هڅولي او همدې لارې ته یې لومړیتوب ورکړی دی.
طالبان وايي چې د هرات – خواف اوسپنې پټلۍ افغانستان له نړیوالو بازارنو سره نښلولی او د معدني او صنعتي محصولاتو صادرولو ته یې هم لاره چاره برابره کړې ده.
ویل کېږي چې د هرات – خواف اوسپنې پټلۍ د افغانستان او ایران ترمنځ مهمه سوداګریزه لار ګڼل کېږي او د دغو دوو هېوادونو ترمنځ د توکو د لېږد رالېږد پر مهمو مسیرونو بدله شوې ده.
