۸صبح، کابل: په اسلاماباد کې د تاجکستان سفیر یوسف شریفزاده او د پاکستان د دفاع وزیر خواجه محمد اصف د افغانستان په هکله خبرېاترې کړې دي.
خاور میانه خبري اژانس جمعه د وږي پر ۳۰مه راپور ورکړی چې په دې خبرو کې بېلابېل په ځانګړې توګه امنیتي موضوعات مطرح شوي دي.
دې دوو چارواکو زیاته کړې چې د طالبانو تر واک لاندې افغانستان وضعیت د سیمې پر امنیت اغېز کړی دی.
د پاکستان دفاع وزیر او د تاجکستان سفیر د دوشنبه او اسلاماباد ترمنځ د اړیکو پر پراختیا ټینګار کړی دی.
د هوايي چلن د امنیت په برخه کې تخنیکي همکاري د دې خبرو بله موضوع ده.
په افغانستان کې د بېلابېلو پوځي ډلو زیاتوالی د ګاونډیو هېوادونو ګډه اندېښنه بلل کېږي.
تر دې مخکې پاکستاني او تاجکستاني چارواکو د طالبانو تر واک لاندې افغانستان کې د «ترهګرو ډلو» د فعالیتونو د پراخېدو په هکله اندېښنه ښودلې وه.
څو ورځې مخکې په ملګرو ملتونو کې د پاکستان دایمي استازې منير اکرم د دغه سازمان د امنیت شورا په غونډه کې ویلي و چې پر افغانستان واک ته د طالبانو له رسېدو درې کاله وروسته لا هم په هېواد کې وضعيت بې ثباته دى.
د اکرم د څرګندونو پر بنسټ، تحریک طالبان پاکستان (ټيټيپي) په افغانستان کې ترټولو ستر «ترهګریز سازمان» دی چې د طالبانو په بشپړ ملاتړ سره د ده د هېواد پر پرځیانو بریدونه پلانوي.
