د ایران ولسمشر مسعود پزشکیان ویلي چې د هېواد عملي تګلاره یې په سیمه او ټولو اسلامي هېوادونو کې د سولې او امنیت پراخول دي.
د ایرنا خبري اژانس د راپور په حواله، پزشکیان دا څرګندونې دوشنبه د ډسمبر پر ۳۰مه د عمان بهرنیو چارو له وزیر سید بن حمد بن حمود البوسعیدي سره په کتنه کې کړې دي.
نوموړي د ایران او عمان اړیکې تاریخي او ژورې وبللې او د دواړو هېوادونو د تاریخي، دوستانه او اقتصادي اړیکو پر پراختیا یې ټینګار کړی دی.
د ایران ولسمشر د اسلامي هېوادونو ترمنځ لانجې د اسرائیلو لپاره یو چانس بللی دی.
ورته مهال البوسعیدي له ایران سره د اړیکو پراخول بیا د عمان لپاره یو نه بدلېدونکی اصل بللی دی.
د یادونې ده چې عمان له دې وړاندې د امریکا په مشرۍ د ایران او لوېدیځ ترمنځ په اټومي خبرو کې د دواړو لوریو ترمنځ منځګړيتوب کړی و.
