۸صبح، هرات: د ټاپي پروژې مسوولانو ویلي چې د ټاپي د ګازو نل لیکه د هرات ښار دروازو ته رسېدلې او هڅې روانې دي چې دغه نل لیکه د هرات ښار او د دې ولایت صنعتي ښارګوټي ته ورسول شي.
د ټاپي پروژې عمومي رییس محمد مراد امانوف چهارشنبه د تلې پر ۸مه، په هرات کې د طالبانو له والي نوراحمد اسلامجار سره په کتنه کې ښار ته د ګازو نل لیکې د لېږد د چمتووالي په اړه خبرې کړې دي.
اسلامجار په دې کتنه کې د هرات ښار دروازو ته د ټاپي نل لیکې له نږدې کېدو خوښي ښودلې او د دې پروژې په پلي کېدو کې یې د سیمهییزې ادارې پر همکارۍ ټینګار کړی دی.
امانوف هم ویلي چې د ټاپي پروژې مسوولان هڅه کوي اړین اقدامات ترسره کړي، څو د ګازو نل لیکه د هرات ښار او د دې ولایت صنعتي ښارګوټي ته ورسېږي.
د ټاپي پروژه څه باندې یو زر او ۸۰۰ کیلومترو اوږدوالی لري چې له ۸۲۰ کیلومترو ډېره برخه یې د افغانستان له خاورې تېرېږي.
د شمېرو له مخې، افغانستان به په درېیو پړاوونو کې هر کال له ۵۰۰ میلیونه تر یو نیم میلیارد متر مکعبه پورې د ټاپي ګاز ترلاسه کړي.
همداراز، افغانستان به پاکستان او هند ته د تاپي ګازو د لېږد له لارې هر کال شاوخوا ۴۰۰ میلیونه ډالر عواید ترلاسه کړي.
