د کابل په لوېدیځ کې سرچینې وايي چې طالبانو تېره اوونۍ لږ تر لږه ۱۰ آنلاین پلورونکې ښځې نیولې دي. د سرچینو په وینا، دغه ښځې د تېرې چهارشنبې په ورځ هغه مهال ونیول شوې چې د کابل په لوېدیځ کې د یوې استوګنیزې ودانۍ یوه کور کې کې د خپلو کاري فعالیتونو د پرمخ وړلو لپاره راټولې شوې وې. تر اوسه د دغو ښځو د نیول کېدو او بېرته خوشې کېدو په اړه نور جزیات نه دي خپاره شوي.
د کابل د لوېدیځ یو شمېر اوسېدونکي د طالبانو د سیستماتیکو فشارونو په اړه اندېښنه څرګندوي او وايي چې دغه ښځې بې له دې چې کوم سیاسي یا مدني فعالیت وکړي، نیول شوې دي. د هغوی په وینا، دغه ښځې د خپلو سوداګریزو فعالیتونو د ترسره کولو لپاره راټولې شوې وې، خو د طالبانو له ځواکونو سره مخ شوې او تر اوسه د هغوی د وضعیت په اړه معلومات نشته.
د سیمې اوسېدونکی علي (مستعار) وايي چې د طالبانو ځواکونه دغه کور ته ننوتل او په کور کې حاضرې نجونې یې له ځان سره بوتلې. هغه زیاتوي چې د سیمې اوسېدونکي د دغو ښځو د نیول کېدو پر دلیل نه پوهېږي.
د کابل د لوېدیځ دغه اوسېدونکی وايي: «طالبان هماغه ځای ته ننوتل او نجونې یې له ځان سره بوتلې. موږ نه پوهېږو چې د دې کار دلیل څه و او ولې یې هغوی ونیولې.»
د دغو ښځو نیول کېدو د یو شمېر آنلاین پلورونکو ښځو اندېښنې هم زیاتې کړې دي. ځینې یې وايي چې د خپلو همکارانو د نیول کېدو د خبر له اورېدو وروسته، د خپل امنیت په تړاو د اندېښنې له امله یې د یوې مودې لپاره خپل کاري فعالیتونه درولي دي.
کبرا (مستعار نوم) چې د آنلاین پلور په برخه کې فعاله ده، وايي چې د دغو ښځو د نیول کېدو د خبر له اورېدو وروسته یې د څو ورځو لپاره خپل آنلاین پلورنځی تړلی و. هغه زیاتوي چې دې پېښې یې پر رواني حالت اغېز کړی او د دې لامل شوې چې د خپل فعالیت د دوام په تړاو اندېښمنه شي.
دغه آنلاین پلورونکې وايي: «د دې خبر له اورېدو وروسته مې د څو ورځو لپاره خپل دوکان وتاړه؛ ځکه رواني حالت مې خراب شو او کار ته له دوام ورکولو ووېرېدم.»
یو شمېر نورې ښځې او نجونې چې آنلاین پلور د خپلو کورنیو د لګښتونو د برابرولو یوازینۍ لار بولي، د دغو ښځو پر نیول کېدو اندېښنه څرګندوي او وايي چې د دې وضعیت دوام به د کار او عاید لپاره د ښځو وروستۍ هیلې هم له منځه یوسي.
یوه آنلاین پلورونکو زلیخا (مستعار نوم) وایي چې د آنلاین پلور له لارې د خپلې کورنۍ د ژوند لګښتونه او د خپل ناروغ پلار د درملنې یوه برخه برابروي. هغه زیاتوي چې په اوسنیو شرایطو کې آنلاین پلور د خپلې کورنۍ د اړتیاوو د پوره کولو لپاره د هغې یوازینۍ هیله ده.
دغه آنلاین پلورونکې وايي: «د آنلاین پلور له لارې د خپلې کورنۍ نفقې او د خپل ناروغ پلار د درملنې پیسې برابرم. زما یوازینۍ هیله همدا آنلاین پلور دی او که کار ونه شم کړام، نه پوهېږم چې د خپلې کورنۍ لګښتونه به څنګه برابر کړم.»
دغه ښځې په داسې حال کې نیول کېږي چې د ښځو پر کار او اقتصادي فعالیتونو د پراخو محدودیتونو له لګېدو وروسته، په افغانستان کې یو شمېر ښځې د ژوند د لګښتونو د برابرولو لپاره آنلاین فعالیتونو او د ټولنیزو شبکو له لارې د توکو پلور ته مخه کړې ده.
دا په داسې حال کې ده چې په تېرو څو ورځو کې سرچینو د کابل په ځینو سیمو، په ځانګړې توګه د تایمنیو په سیمه کې د طالبانو د محتسبانو له خوا د ښځو د نیول کېدو په تړاو اندېښنه څرګنده کړې ده. هغوی ویلي چې د طالبانو د محتسبانو له خوا د ښځو ځورول د پخوا پرتله زیات شوي او هغه ښځې چې د خپلو اړتیاوو د پوره کولو لپاره له کوره بهر وځي، نیول کېږي او زنداني کېږي.
