۸صبح، خوست: په خوست کې صرافانو په دغه ولایت کې په خپلې هټۍ کې د یوه صراف د وژل کېدو په غبرګون کې د دوېیمې پرلپسې ورځې لپاره کاري اعتصاب کړی دی.
د خوست صرافانو تر هغې وروسته کاري اعتصاب وکړ او خپلې هټۍ یې وتړلې، چې د چهارشنبې ورځې په سهار د وري په ۲۳مه، د دغه ولايت د مرکز اړوند د زاړه ښار د صرافۍ مارکېټ ته درې وسله وال غله ورننوتل او د یوې صرافۍ خاوند یې په ډزو ووژاه او پيسې يې ترې یوړې.
اعتصاب کوونکي صرافان د دې پېښې د عاملینو د نیولو غوښتنه کوي.
په خوست کې د صرافانو ټولنه غړي خبرداری ورکوي، چې تر هغو به خپل اعتصاب ته دوام ورکړي، چې امنیت یې په سم ډول نیول شوی نه وي.
که څه هم دا په خوست کې د صرافانو د اعتصاب دوېیمه ورځ ده، خو طالبانو تر اوسه ورته هېڅ پاملرنه نه ده کړې.
دا په داسې حال کې ده، چې پرون هم په خوست، پکتیکا او غزني ولایتونو کې پر صرافانو د برید درې پېښې شوې وې.
