د ملي روغې جوړې د عالي شورا د مشرتابه پینځمه ناسته ترسره شوه

د کب په ۲۴مه، د سولې لپاره د امریکا د وړاندیزي طرحې او د افغانستان د سولې بهیر په هکله د سیمه ییزو او نړیوالو ناستو په اړه د بحث لپاره د عبدالله عبدالله په مشرۍ د ملي روغې جوړې د عالي شورا د مشرتابه کمیټې پنځمه ناسته ترسره شوه. ددغې کمیټې غړو ويلي: «د سولې د ټینګښت په موخه له هر اقدامه ملاتړ کوي او د افغانستان اسلامي جمهوریت د تلپاتې او باعزته سولې د بریالیتوب لپاره کلکه او پياوړې اراده لري.»
له بلې خوا د ملي روغې جوړې د عالي شورا ویاند مجیب الرحمان رحیمي وايي چې په دغه ناسته کې پرېکړه شوې چې د افغانستان اسلامي جمهوریت د مذاکراتو بهیر له چټکتیا هرکلی کوي او همداراز د زلمي خلیلزاد د وړاندیزي طرحې په دقیق څېړلو له امریکا سره خپل دریځ شریکوي. د رحیمي په وینا، د سیمه ییزو او نړیوالو ناستو په اړه هم پرېکړه شوې چې افغانستان پکې ګډون کوي.
د ملي روغې جوړې د عالي شورا له خوا د امریکا د طرحې په هکله وروستۍ پرېکړه نه ده اعلان شوې، خو عبدالله عبدالله وېلي چې باید د امریکا له خوا د طرحې او همداراز د سیمه ییزو او نړیوالو ناستو په هکله چې ټاکل شوې په نږدې راتلونکي کې ترسره شي واحد او روښانه دریځ غوره شي.
هغه زیاته کړه: «موږ د بحثونو له مطرح کولو وېره نه لرو، خو باید د افغانستان د خلکو او دولت دریځ او غوښتنه روښانه وي.»
د سپېدار د اعلان له مخې، په دغه ناسته کې ټینګار شوی چې د سولې بحث د افغان دولت او خلکو له خوا مطرح شوي او د افغانستان سوله سیمه ییز او نړیوال اړخ لري.
د ملي روغې جوړې د عالي شورا د مشرتابه کمیټې غړو ویلي چې د سیمې او نړۍ هڅې او صادقانه ملاتړ کولی شي د سولې بهیر د بریالیتوب ضمانت وکړي.
د ملي روغې جوړې عالي شورا د مشرتابه کمیټې په پینځمه ناسته کې ددغې کمیټې هغه یو شمېر غړي چې په تېرو ناستو کې حاضر نه وو، په دې ناسته کې یې ګډون کړی و.