۸صبح، کابل: «له پولیو پاک افغانستان» بنسټ اعلان کړی چې د ماشومانو د معافیت د کچې د لوړولو په موخه د څو اړینو واکسینونو د چټک تطبیق کمپاین (MAAC) پیل شوی او په لړ کې به یې ماشومانو ته د هغوی د عمر او اړتیا له مخې اړین واکسینونه ورکول کېږي.
دغه بنسټ شنبه د زمري پر ۱۰مه، پر خپله اېکسپاڼه کې لیکلي چې په دې کمپاین کې به د پولیو د خولې واکسین (OPV) ترڅنګ، د پولیو غیرفعال واکسین (IPV) هم تطبیق شي، څو د دې ناروغۍ پر وړاندې د ماشومانو معافیت لا پیاوړی شي.
د شري واکسین او پنټاوالنټ واکسین چې د ډیفټري، تور ټوخي، ټیټانوس، هپاټیت «بي» او د «اېچآیبي» د باکتریا له امله د رامنځته کېدونکو ناروغیو د مخنیوي لپاره کارول کېږي، هم د دې کمپاین برخه دي.
دغه بنسټ زیاته کړې چې د سینهبغل واکسین د ماشومانو د سینهبغل او یو شمېر نورو خطرناکو ساري ناروغیو د مخنیوي لپاره او د «روټا ویروس» هم د دې ویروس له امله د رامنځته کېدونکو شدیدو نسناستو د مخنیوي لپاره په دې کمپاین کې ورکول کېږي.
«له پولیو پاک افغانستان» بنسټ پرون هم اعلان کړی و چې د څو واکسینونو د چټک تطبیق کمپاین به د شنبې په ورځ په افغانستان کې پیل شي او لس ورځې به دوام وکړي.
