۸صبح، ننګرهار: د ننګرهار سیمهییزې سرچينې وايي چې طالبانو په دغه ولايت کې د بانکي تضمين او جواز نشتوالي له کبله شاوخوا ۲۰۰ صرافۍ تړلې دي.
سرچينو جمعه د وږي پر ۱۶مه ویلي چې دا صرافۍ د ننګرهار په مرکز جلالاباد ښار کې موقعيت لري او دوه ورځې دمخه د طالبانو له خوا تړل شوې دي.
یو صراف ۸صبح ورځپاڼې ته ویلي چې طالبانو د پیسو له صرافانو څخه د یو میلیون افغانیو د جواز ترڅنګ د بانکي تضمین غوښتنه هم کړې ده.
هغه زیاتوي چې له يوې خوا د جواز ترلاسه کولو په پروسه کې خنډونه شته او بل خوا د يو ميليون افغانيو بانکي تضمين وس نه لري، خو طالبانو دا پروسه جبري اعلان کړې ده.
د ده په خبره، په تېرو دوو ورځو کې صرافانو ته لسګونه زره افغانۍ مالي زيان اوښتى دى.
په ننګرهار کې طالبانو په رسمي ډول په دې تړاو څه نه دي ویلي.
دا په داسې حال کې ده چې تېره ورځ د هرات صرافانو هم په دغه ولايت کې د طالبانو والي نوراحمد اسلامجار د دفتر مخې لاريون وکړ.
د دې صرافانو په خبره، څه باندې یوه میاشت کېږي چې طالبانو صرافۍ تړلي او د کار جواز او تضمین په بدل کې یې نهه میلیونه افغانۍ غوښتې دي.
