۸صبح، کابل: په ننګرهار کې د طالبانو د زراعت رییس ویلي، چې سږ کال په دغه ولایت کې ۵۵۰ ټنه شات تولید شوي دي.
د طالبانو دا سیمه ییز مسوول وایي، چې په دغه ولایت کې د شاتو مچیو ۶۵۰ فارمونه شته، چې ۴۰ زرو کورنیو ته يې ګټه وټه رسېږي.
ننګرهار کې د طالبانو د زراعت رییس په وینا، د دغه ولایت ګبین په ټول هېواد کې پلورل کېږي. هغه په ډاګه کړې، چې د ننګرهار شات په کابل، بلخ او د هېواد په ځینو نورو ولایتونو کې د خرڅلاو مرکزونه لري. نوموړی وايي، په دغه ولایت کې د هر کیلو شاتو بیه له ۳۰۰ تر ۱۰۰۰ افغانیو پورې ده.
ننګرهار د هېواد حاصلخېز ولایت دی، چې د حاصلاتو، مالدارۍ او شاتو مچیو پر فارمونو سربېره، دا ولایت د چرګانو د روزنې فارمونه هم لري.
