۸صبح، کابل: د طالبانو د سوداګرۍ او پانګونې خونې مسوولانو او د قرغیزستان سفیر د مستقیمې سوداګریزې لارې پر رامنځته کولو، د ټرانزیټي همکاریو پر پراخولو او د پنځو هېوادونو د اوسپنې پټلۍ پروژې د بیا فعالولو په اړه خبرې کړې دي.
باختر خبري اژانس پنجشنبه د تلې پر ۲۳مه راپور ورکړی چې د طالبانو د سوداګرۍ او پانګونې خونې د ټرانسپورټ او ټرانزیټ کمېټې رییس او غړو یې په کابل کې د قرغیزستان له سفیر تورداکان سیدیکوف سره لیدلي دي.
د راپور پر بنسټ، دواړو لورو د چین، قرغیزستان، تاجکستان، افغانستان او ایران ترمنځ د پنځو هېوادونو د اوسپنې پټلۍ د ارزښت په اړه خبرې کړې او د سیمهییز نښلون د پیاوړتیا، د سوداګرۍ د پراختیا او د اقتصادي همکاریو پر زیاتوالي یې ټینګار کړی دی.
د قرغیزستان سفیر د دغو پروژو د عملي کار د پیل لپاره د خپل هېواد د چمتووالی خبر ورکړی دی.
همداراز دواړو لورو د سوداګرۍ د اسانتیاوو او د طالبانو او قرغیزستان ترمنځ د اقتصادي اړیکو د پیاوړتیا لپاره د همکاریو پر دوام او د ترانسپورټي زیربناوو پر پراختیا ټینګار کړی دی.
