۸صبح، لوګر: په لوګر کې د طالبانو امنیه قوماندانۍ وايي چې د دغه ولایت د مرکز اړوند په «بابوس» سیمه کې د یوې ترافیکي پېښه په پایله کې درې ماشومان مړه شوي دي.
نوموړې قوماندانۍ پنجشنبه د وږي پر ۲۶مه په خپرې کړې خبرپاڼې کې ویلي چې دا پېښه د ډېر سرعت او د چلوونکي د بې احتیاطۍ له کبله رامنځته شوې ده.
د خبرپاڼې له مخې، موټر د ډېر سرعت له کبله د چلوونکي له کنټروله وتله او چپه شوې چې په پایله کې یې د یوې کورنۍ درېیو ماشومانو ژوند بایللی دی.
دا په داسې حال کې ده چې په افغانستان کې د ډېرو ترافیکي پېښو لاملونه ډېر سرعت، ترافیکي قوانینو ته نه پاملرنه، د سړکونو خرابوالی او د موټروانانو بې احتیاطي بلل کېږي.
