۸صبح، کابل: د روغتیا نړیوال سازمان (WHO) وايي چې خوندي او باکیفیته روغتیايي خدماتو ته د هغو ناروغانو لاسرسی چې له غیرساري ناروغیو سره مخ دي، اړین دی.
نوموړي سازمان پنجشنبه د وږي پر ۲۶مه په اېکس پاڼه کې لیکلي چې په افغانستان کې له مخنیوي وړ ناروغیو د ناروغانو خوندیتوب او له روغتیايي خدماتو ډاد، ګډ مسوولیت دی.
د روغتیا نړیوال سازمان زیاته کړې چې د ناروغانو خوندیتوب د باکیفیته روغتیايي پاملرنې بنسټيزه برخه ده او ناروغانو ته دې د خوندي او اغېزمنو روغتیايي خدماتو د وړاندې کولو لپاره هڅې وشي.
په افغانستان کې د روغتیا نړیوال سازمان استازي اډوین سینیزا سلوادور ویلي چې په ګډه دې ډاډ ترلاسه شي چې هر ناروغ د درملنې او روغتیايي پاملرنې په ټولو پړاوونو کې خوندي او اغېزمن خدمات ترلاسه کوي.
دا څرګندونې د ناروغانو د خوندیتوب د نړیوالې ورځې په مناسبت شوې دي.
