د امریکا حکومت د نړيوالې جزايي محکمې پر وړاندې د یو لړ بندیزونو د چمتو کولو په لټه کې دی او هوډ لري چې ژر دا بندیزونه اعلان کړي.
رویټرز دوشنبه د سپټمبر پر ۲۱مه، راپور ورکړی چې دا موضوع د امریکا د حکومت له دې پرېکړې دوو باخبرو سرچینو بیان کړې ده.
د راپور له مخې، د امریکا د حکومت دا اقدام به پر دغه نړیوال قضایي بنسټ د واشنګټن بریدونه خورا تېز کړي؛ هغه بنسټ چې په ټوله نړۍ کې د جنګي جنایتونو او نسل وژنې څېړلو مسوولیت پر غاړه لري.
امریکايي چارواکي غواړي چې دا محکمه د اسراییلو د مشرانو د نیولو حکمونه او همدا راز په افغانستان کې د امریکايي ځواکونو د کړنو په اړه پخوانۍ څېړنې لغوه کړي.
د باخبرو سرچینو په وینا، د دغې محکمې پر وړاندې بندیزونه چمتو شوي، که څه هم د هغو د دقیق اعلان وخت تر اوسه څرګند نه دی.
په مستقیم ډول د دغه ټول سازمان او د هغه د همکارو بنسټونو په نښه کول کولای شي د محکمې فعالیتونه خورا ګډوډ کړي.
